Бишкектеги ооруканалар сасык тумоонун сезондук күчөшүнө даярдалууда
Министрлер кабинетинин төрагасынын орун басары Улан Маматканов Бишкектеги эки ооруканага барып, алардын курч респиратордук вирустук инфекция жана сасык тумоо менен ооругандардын санынын мезгилдик өсүшүнө даярдыгын текшерди. Бул тууралуу Минкабдын басма сөз кызматы билдирди.
Ал кабыл алуу бөлүмдөрүнүн жана адистештирилген бөлүмдөрдүн иши, бейтаптарды ооруканага жаткыруунун шарттары, ошондой эле дарылоо-диагностикалык процессти уюштуруу менен таанышты.
Республикалык клиникалык жугуштуу оорулар ооруканасында 300 керебетке эсептелген 8 бөлүм ачылды. Шаардык балдардын тез жардам клиникалык ооруканасында дагы 50 керебет даярдалды.
Барып көрүү учурунда ошондой эле ооруканалардын жүктөмү, реанимация жана интенсивдүү терапия бөлүмдөрүнүн иши, кадр менен камсыздоо, жабдуулардын жана дары-дармектердин болушу талкууланды.
Маматканов Саламаттыкты сактоо министрлигине жана медициналык уюмдардын жетекчилерине кабыл алуу бөлүмдөрүнүн ишин күчөтүүнү, бейтаптарды өз убагында кароону жана медициналык көрсөткүчтөр боюнча ооруканага жаткырууну камсыз кылууну тапшырды.
Стационардык мекемелердин, тез медициналык жардам кызматынын жана саламаттыкты сактоонун алгачкы звено уюмдарынын ортосундагы координацияны күчөтүү жана медициналык мекемелерге түшкөн жүктөм көбөйгөндө кошумча чараларды өз убагында көрүү милдети коюлду.
