Үгүт иштерине тоскоолдук кылган «домком» жана кварталдык жетекчилерге айып салуу сунушталды
Шайлоо учурунда мыйзамдуу үгүт жүргүзүүгө тоскоол болгондор үчүн административдик жазаларды киргизүү боюнча мыйзам бузуулар жөнүндө кодекске өзгөртүү киргизүү боюнча мыйзам долбоору парламенттин кароосуна жөнөтүлдү. Мыйзам долбоорунун автору – депутат Дастан Бекешев.
Документке ылайык, Укук бузуулар жөнүндө кодекстин 65-беренесин үгүт ишмердүүлүгүнө тоскоолдук жараткан аракеттер үчүн айып пул салууну караган нормалар менен толуктоо сунушталууда. Жеке адамдар үчүн айып пулдун өлчөмү 10 миң сомду, ал эми ТСЖнын (көп батирлүү үйлөрдүн шериктештиги) жетекчилери, кварталдык комитеттердин жана башкаруучу компаниялардын жетекчилери үчүн 20 миң сомду түзөт.
Түшүндүрмө катта белгиленгендей, практикада айрым домкомдор, кварталдык комитеттердин өкүлдөрү жана ТСЖ төрагалары өз кызматтык абалынан пайдаланып, тургундарга жана ишкерлерге кысым көрсөтүшү мүмкүн. Мисалы, үгүт материалдарын жайгаштырууга тыюу салуу же айрым талапкерлерге артыкчылыктуу шарттарды түзүү учурлары кездешет. Ошондой эле үгүт иштерине тоскоолдуктар жөнөкөй жарандар тарабынан да жаралышы мүмкүн экени айтылат — жолугушууларды үзгүлтүккө учуратуу, чагымчыл аракеттерди уюштуруу жана үгүтчүлөргө басым көрсөтүү аркылуу.
Мыйзам долбоору административдик ресурстарды кыянаттык менен пайдалануунун алдын алууга жана шайлоо процессинин бардык катышуучулары үчүн бирдей шарттарды камсыздоого багытталган.
