Чычкан капчыгайындагы «Арал» постунда жүк ташуучу унааларга коюлган чектөө алынды

Бүгүн, 13 ноябрда эртең мененки саат 07:00 Бишкек — Ош унаа жолунун 272-чакырымында («Арал» посту) жүк ташуучу унаалардын өтүүсүнө киргизилген чектөөлөр алынды. Бул тууралуу Транспорт жана коммуникациялар министрлигинен билдиришти.

Маалыматка ылайык, «Кыргызавтожол» мамлекеттик ишканасынын №23 жол тейлөө ишканасы тарабынан Бишкек — Ош унаа жолунун Ала-Бел ашуусунда жана Чычкан капчыгайында аба ырайынын шартына байланыштуу жолдорду кардан тазалоо жана инерттик материалдарды себүү иштери жүргүзүлүүдө.

Белгилей кетсек, 12-ноябрь саат 20:00дөн тарта жасалма тыгындарды болтурбоо максатында аба ырайы жана климаттык шарттар жакшырганга чейин «Арал» постунда жүк ташуучу унаалардын өтүүсүнө убактылуу чектөөлөр киргизилген.