Бишкекте окуучулар көзү көрбөгөн жана начар көргөн адамдар үчүн акылдуу көз айнек иштеп чыгышты

Бишкектеги жогорку класстын окуучулары көзү көрбөгөн жана начар көргөн адамдар үчүн үн аркылуу иштеген жасалма интеллект жардамчысы бар «акылдуу» EyeSens көз айнегин иштеп чыгышты.

Көз айнектин алкагына орнотулган камера айлана-чөйрөнү байкап, маалыматтарды смартфонго жөнөтөт. Андан кийин система сүрөттөрдү жергиликтүү машиналык окутуу моделдери жана Gemini жасалма интеллектинин жардамы менен талдайт.

AIris үн жардамчысы маалыматтарды сөөк аркылуу үн өткөрүүчү динамиктер аркылуу айтып берет. Мунун аркасында колдонуучунун кулагы айланадагы үндөрдү угуу үчүн бош бойдон калат, ал эми колдору эркин болот. Түзмөктү «Эй, Айрис» деген үн буйругу менен башкарууга болот.

Учурдагы прототип буюмдарды тааный алат, айлана-чөйрөнү сүрөттөп берет жана орус жана англис тилдериндеги тексттерди окуйт. Ошондой эле иштеп чыгуучулар интернетке туташпай туруп объекттерди таануу мүмкүнчүлүгүн сынап жатышат.

Команданын изилдөөсүнө ылайык, сурамжылоого катышкан Кыргызстандагы көзү көрбөгөн адамдардын 94,4 пайызы тротуарларда токтоп турган унааларга туш болушат, ал эми 83,3 пайызы бет деңгээлиндеги бутактардан улам жаракат алышкан.

Долбоордун авторлору EyeSens кыргыз жана орус тилдерине ылайыкташтырылып, чет өлкөлүк окшош түзмөктөргө караганда 12–50 эсе арзан болушу мүмкүн экенин билдиришти. Бирок түзмөктүн акыркы баасы жана массалык чыгаруу мөөнөтү азырынча айтыла элек.

Иштеп жаткан прототипти окуучулар Жогорку Кеңештин депутаты Дастан Бекешевге көрсөтүштү.

Долбоордун үстүндө Баяман Ажымырзаев, Канат Тынчтыкбеков, Аманат Эрмаматов, Султанмурат Эркинбеков жана куратор Ботокөз Сооронбаева иштеп жатышат.