Күндө кубаттуулугу М классына кирген жаркыроо катталды
6-октябрга караган түнү Күндө кубаттуулугу боюнча акыркыдан бир мурунку М классына кирген жаркыроо катталды. Бул тууралуу ТАСС Колдонмо геофизика институтуна (ИПГ) шилтеме берүү менен билдирди.
Мекеменин маалыматына караганда, M1.1 класстагы жаркыроо 5-октябрда Москва убактысы боюнча саат 21:48де рентген диапазонунда Күндөгү 4545 күн тактарынын тобунда (N19E10) болгон.
Жаркыроонун узактыгы болжол менен 30 мүнөттү түзгөн.
Күндөгү жаркыроолор рентген нурлануусунун кубаттуулугуна жараша A, B, C, M жана X деген беш класска бөлүнөт. A0.0 классы Жердин орбитасындагы нурлануунун чарчы метрге 10 нановатт кубаттуулугуна туура келет. Кийинки тамгага өткөн сайын нурлануунун кубаттуулугу 10 эсеге жогорулайт.
Мындай жарылуулар Күндүн плазмасынын бөлүнүп чыгышы менен коштолушу мүмкүн. Плазманын булуттары Жерге жеткенде магниттик бороондорду жаратышы ыктымал.
