Диетологдор сөөктү бекемдөөчү азыктарды аташты
Диетологдор Алисса Пайк жана Карли Сен-Лоран Босежур улгайган адамдардын сөөктөрүн бекемдөөгө жардам бере турган азыктарды аташты.
Адистердин айтымында, кальцийдин запасын толуктап, сөөктөрдү бекемдөө үчүн сүт жана жалбырактуу жашылчаларды колдонуу керек. Алардын катарына кресс-салат, брокколи, горчица жалбырагы жана бок-чой кирет. Бул азыктардагы кальций организмге сүт азыктарындагы кальций сыяктуу эле жакшы сиңет.
Мындан тышкары, диетологдор сөөк ткандарынын тыгыздыгын сактоого жардам берген магнийге бай азыктарды сунушташты. Айрыкча ашкабактын уругунда магний көп. Куурулган ашкабактын уругунун 28 граммында магнийдин суткалык керектөөсүнүн болжол менен 37 пайызы бар.
Ошондой эле адистер омега-3 май кислоталарына бай азыктарды рационго кошууну сунушташты. Алар сезгенүүнү азайтууга жана сөөктөрдүн ден соолугу үчүн маанилүү болгон майда эрүүчү витаминдердин сиңишине көмөктөшөт.
Диетологдордун айтымында, консерваланган сардина жана лосось омега-3 май кислоталарына бай. Аларды сөөктөрү менен кошо жегенде организм кошумча кальций алат. Мындан тышкары, бул балыктардагы белок организмде коллагендин пайда болушун колдоп, сөөк ткандарынын бекемдигин сактоого жардам берет.
