Дарыгер сасык тумоо учурунда көпчүлүк кетирген катаны атады
Жалпы практика дарыгери Роджер Хендерсон сасык тумоо же грипптин белгилери жеңилдей баштаганда эле жумушка чыгууга шашылбоо керектигин айтты. Бул тууралуу ал Daily Mirror басылмасына билдирген.
Дарыгердин айтымында, көпчүлүк адамдар сасык тумоо менен ооруп жатканда эмгек өргүүсүнө чыкпай же айыгып бүтө электе жумушка кайтып келишет. Бул оорунун кайра күчөшүнө, ден соолуктун начарлашына жана айланадагыларга инфекция жуктуруу коркунучунун жогорулашына алып келиши мүмкүн.
«Оорунун белгилеринин жеңилдеши толук айыгып кетүү дегенди билдирбейт», — деп эскертти дарыгер.
Адистин түшүндүрмөсүндө, дене табын түшүрүүчү, мурун бүтүүгө, тамак оорусуна жана жөтөлгө каршы дарылар оорунун белгилерин жеңилдетет. Бирок организмдин калыбына келишине эң жакшы жардам берген нерселер — эс алуу, жетиштүү уктоо жана суюктукту көп ичүү.
«Бул мурундан суу аккан сайын төшөктө жатып, эч нерсе кылбоо керек дегенди билдирбейт. Эң негизгиси — организм качан жайыраак иштеп, эс алууга муктаж экенин түшүнө билүү», — деп жыйынтыктады дарыгер.
