Диетолог күнүнө бир алма жештин пайдасын түшүндүрдү

Диетолог Дурвал Рибас Фильо күн сайын бирден алма жеп туруу организмге кандай оң таасирлерди берерин айтып берди. Бул тууралуу Terra басылмасы жазды.

Адис бир дагы азык-түлүк оорулардын алдын алууга толук кепилдик бере албасын белгилеген. Ошентсе да, алманын ден соолукка пайдасы чоң экенин түшүндүргөн.

Дарыгердин айтымында, биринчиден, алма курамындагы клетчатканын жардамы менен ичегинин иштешин жакшыртат. Экинчиден, бул мөмө токчулук сезимин узак убакытка сактоого жардам берет.

Мындан тышкары, алманын курамындагы антиоксиданттар организмдин клеткаларын коргоп, жүрөк-кан тамыр системасынын саламаттыгын колдоого көмөктөшөт.

Адис белгилегендей, алманы үзгүлтүксүз колдонуу салмакты көзөмөлдөөгө, иммундук системанын ишин жакшыртууга, жаралардын тезирээк айыгышына жана коллагендин пайда болушуна оң таасирин тийгизиши мүмкүн.

Диетолог алманы жаңы бойдон жегенди же мешке бышырып колдонууну сунуштаган. Ал эми алма ширесин ичүү анчалык пайдалуу эмес, анткени анда бүтүн алмадагы клетчатка азыраак болот.