Түндүк Корея модификацияланган баллистикалык ракеталарын сыноодон өткөрдү
Түндүк Кореянын ракеталык курулуш боюнча башкы башкармалыгы «жер–жер» класстагы «Хвасонпхо-11ра» аттуу жаңыртылган тактикалык баллистикалык ракеталарды сыноо иретинде учурууну ишке ашырды. Бул тууралуу Кореянын Борбордук телеграф агенттиги (ЦТАК) билдирди.
Учурууну КЭДРдин лидери Ким Чен Ын, ошондой эле партиялык жана аскердик жетекчиликтин өкүлдөрү көзөмөлдөшкөн. Жалпысынан 136 чакырым алыстыктагы бутага карай беш ракета учурулган. Сокку 12,5–13 гектар аянтка жогорку тыгыздыкта тийгизилген. Сыноо жарылуу коркунучу бар фрагменттүү дүрмөттөрдүн иштешин текшерүү үчүн өткөрүлдү.
Ким Чен Ын сыноонун жыйынтыгына канааттанганын билдирип, ракета үчүн согуштук бөлүктү иштеп чыгуу менен беш жыл бою алектенген адистердин эмгегин белгиледи.
Буга чейин, 9-апрелде, ЦТАК Түндүк Кореяда чачыроочу согуштук бөлүгү бар тактикалык баллистикалык ракета жана электромагниттик курал системасы сыноодон өткөнүн билдирген. Анын жыйынтыгында баллистикалык ракета системалары боюнча илимий-изилдөө институту «Хвасонпхо-11-га» ракетасынын кассеталык бөлүгү 6,5–7 гектар аянттагы буталарды жогорку тыгыздыкта жок кыла аларын баалаган.
Январь айынын башында Түндүк Корея Ким Чен Ындын көзөмөлүндө гиперүндүү ракеталарды да сыноодон өткөргөн. Ракеталар Чыгыш деңизиндеги белгиленген буталарды ийгиликтүү бутага алган.
«Ачык айтканда, биздин иш-аракеттер ядролук токтотуу мүмкүнчүлүгүн жогорку деңгээлге акырындык менен жеткирүүгө багытталган. Мунун зарылдыгын акыркы геосаясий кризис жана татаал эл аралык абал тастыктап турат», — деп билдирген Ким Чен Ын.
