Стамбулда коррупцияга байланыштуу 58 аткаминер кармалды
Түркиянын Стамбул шаарында Бакыркөй районунун администрациясындагы коррупция ишине байланыштуу 58 адам кармалды. Бул тууралуу DHA агенттиги билдирди.
Кармалгандардын арасында район башчысынын беш орун басары, муниципалдык кеңештин эки депутаты жана администрациянын айрым бөлүмдөрүнүн жетекчилери бар.
Прокуратура жалпысынан 68 шектүүнү кармоого буйрук берген. Алардын катарына муниципалитеттин кызматкерлери жана тендерлерге катышкан компаниялардын өкүлдөрү кирет. Учурда калган 10 адам изделүүдө.
Көзөмөл органынын маалыматына ылайык, тергөө товарларды жана кызмат көрсөтүүлөрдү сатып алууда мамлекетке зыян келтирген мыйзам бузуулар тууралуу билдирүүлөрдөн кийин башталган.
Ошондой эле ишкерлер мекемелердин иштөөсүнө уруксат берүү үчүн алардан мыйзамсыз акча талап кылынганын билдиришкен. Акча төлөөдөн баш тарткан ишкерлердин документтерин тариздөө атайылап создуктурулганы айтылууда.
Эксперттер муниципалитеттин ар кандай бөлүмдөрү тарабынан 2024–2026-жылдары өткөрүлгөн 42 тендердин документтерин изилдешкен. Тергөөчүлөр шектүүлөрдүн телефон байланыштары тууралуу маалыматтарды жана финансылык чалгындоо материалдарын да талдашкан.
Тергөө тендерлерди өткөрүүдөгү алдамчылыкка жана кызматтык абалынан пайдаланып акча талап кылууга шектенүү боюнча жүргүзүлүүдө.
Операция район башчысы жана муниципалдык кеңештин айрым депутаттары Республикалык элдик партиядан оппозициядагы «Жаңы партияга» өтүшү күтүлүп жаткан күнү өткөрүлгөн.
