Министр Чүй облусун кыдырып өрттөн куткаруунун шарттары менен таанышты

Өзгөчө кырдаалдар министри Канатбек Чыныбаев Чүй облусу менен Бишкек шаарында жайгашкан ӨКМдин өрт-куткаруу бөлүктөрүн кыдырып, өздүк курамдын иштөө шарттары менен таанышты. Бул тууралуу аталган министрликтен билдиришти.

Маалыматка ылайык, министр ӨКМдин Бишкек шаары боюнча башкармалыгына караштуу №3, №4, №8 өрт-куткаруу бөлүктөрү, Токмок шаарындагы №21, Чүй районундагы №24, Кеминдеги №5, Ысык-Ата районундагы №4, Кант шаарындагы №27 бөлүгүнө иш сапары менен барып, материалдык-техникалык базанын абалына өзгөчө көңүл бурду.

Ошондой эле өрт өчүрүүчү-куткаруучулардын күжүрмөн даярдыгы, социалдык шарттары, эс алуу жана нөөмөт өтөө жайларынын талапка шайкештигин текшерип, айрым кемчиликтерди ыкчам жоюу жана кызматтын натыйжалуулугун жогорулатуу боюнча тиешелүү жетекчилерге тапшырмаларды берди.